About the major

 

السلام عليكم أخواني،

أنا محمد الأسدي و إن شاء الله بكون وياكم في الكورسات مادة بمادة، ليش؟ لأن في يوم من الأيام أنا كنت بمكانكم و احتجت أحد يكون قريب خبرة و يرشدني إلى أفضل طريق في الجامعة.

أولًا قبل أي شي، لازم نعرف و أغلبنا يعرف أصلًا ان الجامعة مرحلة مختلفة كليًا عن الثانوية، من ناحية درجات من ناحية تعب و ضغط و من ناحية وضعك في المجتمع ككل.

يمكن هالكلام أقوله و في ناس يعرفونه و يعونه و في ناس يعرفونه و ما يعونه و في ناس أصلًا ما تعرفه، أي كلام؟ الي قلناه فوق زائدًا معلومة جدًا مهمة، معدلك في الثانوي ما يدل على المعدل الي تسعى انك توصل له في الجامعة، معدلك ٩٨ ما شاء الله ما يدل انك بتكون من أوائل الدفعة في الجامعة عادي جدًا و طبيعي تكون في النص لأن الوضع يختلف، معدلك ٩١ مو شرط بتكون أقل من غيرك في الجامعة، أنا أعرف مثال قريب مني كان  في أول فصل في الثانوي ٨٦ و احين هو الأول في دفعته في الجامعة و ناس بالعكس كانت فوق و صارت تحت.

هذا كله يعتمد على جدكم و اجتهادكم و على استيعابكم المسؤولية الي لازم تتحملونها، ما يهم شنو كان مستواكم الي يهم شنو بيصير سواء انجليزي او ماث او اي شي، كل شي كان ماضي و احين لازم ينبنى الحاضر من جديد.

 

 نصيحتي لكم يا مهندسي تخصصنا ( الأجهزة الدقيقة و التحكم )،

أولًا أولًا أولًا، حاولوا كثر ما تقدرون تمشون على الخطة، لااا تطلع عن مسار الخطة الا بحالة مستعصية لأن كل مادة تفتح مادة و بعدين المواد ما تنزل ويا بعضها من كثر التعارضات.

ثانيًا، شيلوا بعضكم بعض، فهموا و علموا بعض، ساعدوا بعض و تكاتفوا لأن الدرب بدون ما تكونون متساعدين بيصير صعب جدًا جدًا.

ثالثًا لا تعكرون علاقاتكم مع الطلبة لأن كل يوم بتتقابلون لسنين و لا مع الدكاترة و هذا الأسوأ، لأن أكثر الدكاترة بيدرسونكم أكثر من مادة ف إن تعكرت العلاقة بتكون عليكم مشكلة كبيرة.

رابعًا، و هي مقولة لا تؤجل عمل اليوم إلى الغد حرفيًا إذا ما التزمت فيها بتحس روحك انسان ضايع في كومة الضغوطات.

خامسًا، و أخيرًا اجتهدوووا و اتعبوووا أبدًا ما بتحصلون الشيء بسهولة و خلكم دايمًا أول بأول.

 

أخوكم،

محمد الأسدي