PICENG111

Course Code: PICENG 111     Course Title: Introduction to Process Engineering

Units and dimensions. Process and process variables. Process flowchart. Material balances with and without chemical reactions including bypass and recycle. Gas laws, compressibility factor. Multiple-phase systems. Forms of energy. Energy balance for open and closed systems. *(One tutorial hour)

أول مادة تخصصية،

أكيد سمعنا عن المادة واااجد و يمكن تسمعون عنها أكثر من أي مادة في التخصص، واااجد كلام يخوف و شوووي كلام يطمن، ناس تقول سهلللة وناس تقول طلعت روحنا من كثر ما هي صعبة.

انزين، احين نصدق من؟ تبون الكلمة مني؟ تبون الصدق و الواقع؟ هذا جوابكم،انت كشخص الوحيد الي بيحدد وين راح يكون اتجاه المادة و أي صنف بتصنفها هل هي سهلة او صعبة او مقبولة.

على أي أساس بتحدد؟ على أساس الكلام الي بينقال احين، من الحقائق الي بقولها احين انت بتحدد بس مو بداية الكورس، لا لما تخلص لأن الي بقوله حقائق فقط و انت لازم تدل دربك في المادة.

أولًا و الحقيقة الي لازم نعرفها المادة تعتبر من المواد السهلة في التخصص، و ليست صعبة بالنسبة للتخصص، ف أي إنسان قال ان المادة من أصعب المواد أو أصعب مادة في التخصص، هذا انسان كلامه فاضي و كلامه قطوه بحر، لأن المواد الي بتجي أصعب بمراحل، لا تخلون في بالكم أصعب بمراحل يعني وحش 😂 بس أصعب من ١١١، بس ليش مو هي الأصعب؟

لأن الحقيقة الثانية تقول، ان المادة عبارة عن مدخل للتخصص و فيها البيسكس و الأساسيات فقط

خلصنا من أول حقيقتين،

الحقيقة الثالثة تقول، هل المادة سهلة يعني A ؟ لا طبعًا، و هني يكمن سر تفرق الناس بين انها مادة سهلة او صعبة، في فرق بين المادة الصعبة و المادة الثقيلة و الطويلة، و 111 من هذا النوع الطويل، و تحتاج نَفَس طويل جدًا للاستمرار و تحصيل أعلى الدرجات، يعني تحتاج بذل طاقة عمرك انت كطالب ما بذلتها لأنها مادة محتواها جديد كليًا عليك.

الحقيقة الرابعة، الطلبة يسمونها مادة فلتر، ليش؟ لأنها المادة الي تبين الطالب الجامعي من عدمه، الطالب الي يستحق يواصل او لا، صدقوني الي ما بيجتهد و يتعب ما بيطوف و اذا طاف تالي بيتعب بيتعب في التخصص،

يعني احين عرفنا ان المادة سهلة بس تحتاج تعب و جهد.

انزين الجهد و التعب هذا في شنو نصبه؟

بخبركم و حفظوا الأسلوب لأنه بيكون على الأغلب أسلوب كل المواد.

نحل التيتوريال مرة ثانية ( بروحنا )، نحل أسئلة الكتاب الصعبة و الي فيها أفكار، و حل الكتاب موجود عندكم إذا ما عرفت الحل بيكون موجود فلا خوف، و في أسئلة موجودة في الرابط و أفكارها حلوة و موجود حلها بعد، ابحثوا عن مصادر ثانية و الكتب الرفرنس و جوفوا الأسئلة، اتعب اتعب و بتحصل، اما بتطالع و ايدك على خدك، الله يكون في عونك.

وبالنسبة للضعاف في الانجليزي؟

لا تحاتون و هذا أبدا مو عائق، لأن أكثر الناس الي أعرفها و تحصل درجات زينة يكونون ضعاف في الانجليزي و لا مرة تعذروا بالانجليزي لأن ما ليه خص. و أنا عن نفسي حدِث و لا حرج كنت في الانجليزي و الحمدلله من أول ما دشيت الجامعة للحين تطورت وياي اللغة بدل لا تكون عائق.

 

حاولت أختصر كثر ما أقدر، و في النهاية أقول اتمنى نجوف ناس مجتهدة كثيرة في تخصصنا و يرفعون اسمه و يصير معروف للمجتمع و الجامعة أكثر، الله يوفقكم و يسهل عليكم و ادعوا لينا وياكم 😁

أخوكم،

محمد الأسدي